Баткенде селдин кесепеттерин жоюу боюнча көчмө жыйын өткөрүлдү
27-июлда президенттин Баткен облусундагы ыйгарым укуктуу өкүлүнүн биринчи орун басары Бактыбек Токсонбаев Баткен шаарынын селден жабыркаган аймактарын жеринде көрдү. Бул тууралуу облустук админстрациядан билдиришти.
Маалыматка ылайык, көчмө жыйынга Жарандык коргонуу кызматтарынын, Баткен шаарынын мэриясынын жана Өзгөчө кырдаалдар министрлигинин Баткен облусу боюнча башкармалыгынын жетекчилери катышты.
Жетекчилер Баткен шаарынын Сайдыман ажы жана К.Турмаматов көчөлөрүндө, ошондой эле Баткен – Ош унаа жолунда жайгашкан көпүрөлөрдү калыбына келтирүү, аларды өзгөчө кырдаалдар учурунда чоң көлөмдөгү сел сууларын тоскоолдуксуз өткөрүүгө ылайыкташтыруу маселелерин жеринде карашты.
Мындан тышкары, сел жүрүү коркунучу бар аймактардагы мыйзамсыз курулуштарды алуу, сел өтүүчү каналдарды жана нугун тазалоо, жээктерди бекемдөө, ошондой эле мындай кырсыктардын кесепеттерин азайтуу боюнча тийиштүү мамлекеттик жана жергиликтүү органдардын жетекчилерине конкреттүү тапшырмалар берилди.
Белгилей кетсек, 24-июлунда Баткен шаарында нөшөрлөп жааган жаандын кесепетинен сел жүрүп, турак үйлөргө, ички көчөлөргө, унаа жолдоруна, көпүрөлөргө жана административдик имараттарга зыян келтирген. Учурда жабыркаган аймактарда калыбына келтирүү иштери улантылып, селдин кесепеттерин жоюу жана келечекте мындай кырдаалдардын алдын алуу боюнча комплекстүү иш-чаралар жүргүзүлүүдө.
