Мыйзамсыз аңчылык кылгандар эркиндигинен ажыратылат

Президент Садыр Жапаров браконьерлик үчүн жоопкерчиликти күчөткөн мыйзамга кол койду.

Эгер мыйзамсыз аңчылык кылуу, балык же суу жаныбарларын кармоо олуттуу зыянга алып келсе, мыйзам бузган адамга 50 миңден 100 миң сомго чейин айып пул салынат же 2 жылга чейин эркинен ажыратылат.

Мыйзамсыз аңчылык же балык уулоодо унаа, сүзүүчү каражат, авиация, жардыргыч заттар, химиялык каражаттар, электр тогу, синтетикалык торлор же жаныбарларды массалык түрдө жок кылуучу башка ыкмалар менен жүргүзүлсө, 100 миңден 200 миң сомго чейин айып пул салынат же 2 жылдан 5 жылга чейин эркинен ажыратуу жазасы каралган.

өмөнкү учурларда 7 жылга чейин эркинен ажыратуу каралат:

коруктарда браконьерлик кылганда;

сейрек кездешүүчү жана жоголуп бара жаткан жаныбарларды жок кылганда;

кызматтык абалынан пайдаланып мыйзам бузганда;

өзгөчө ири өлчөмдө зыян келтиргенде;

этиятсыздыктан оор кесепеттерге алып келгенде.

Мыйзамга ылайык:

олуттуу зыян — 10 миң сомдон башталат;

ири зыян — 100 миң сомдон башталат;

өзгөчө ири зыян — 1 миллион сомдон жогору сумма деп эсептелет.