Кыргызстанда 2030-жылга чейин жакырчылыкты кыскартуу планы талкууланды
Кыргызстанда 2030-жылга чейин жакырчылыкты кыскартуу жана калкты иш менен камсыз кылууга багытталган пландын долбоору талкууланууда. Бул тууралуу Эмгек министрлигинин басма сөз кызматы билдирди.
Аталган жыйынга Бишкекте өткөн мамлекеттик органдардын, эл аралык уюмдардын жана эксперттик коомчулуктун өкүлдөрү катышты.
Документте жаңы жумуш орундарын түзүү, чакан жана орто бизнести колдоо, эмгек өндүрүмдүүлүгүн жогорулатуу жана жарандардын экономикалык мүмкүнчүлүктөрүн кеңейтүү негизги багыттар катары белгиленген.
Эмгек, социалдык камсыздоо жана миграция министринин орун басары Мирлан Байгончоков белгилегендей, жакырчылыкты азайтуу социалдык колдоо чаралары менен гана чектелбестен, сапаттуу жумуш орундарын түзүү жана ишкердикти өнүктүрүү аркылуу ишке ашырылышы керек.
Улуттук статистика комитетинин маалыматына ылайык, 2025-жылдын жыйынтыгында Кыргызстанда жакырчылыктын деңгээли 24%ды түзүп, мурунку жылга салыштырмалуу 1,7%га төмөндөгөн.
