Чоң-Өрүктүдө экологиялык талапты бузган жаранга айып пул салынды
Интернет булактарында жарыяланган видеонун негизинде Ысык-Көл облусунун Чоң-Өрүктү айылында таштанды калдыктарын белгиленбеген жерге төгүү фактысы аныкталды. Бул тууралуу Жаратылыш ресурстары, экология жана техникалык көзөмөл министрлигинен билдиришти.
Маалыматка ылайык, Экологиялык жана техникалык көзөмөл кызматынын Ысык-Көл регионалдык башкармалыгынын тескөөчүлөрү жүргүзгөн текшерүүдө экологиялык талаптарды бузган жаран аныкталган.
Жыйынтыгында "Укук бузуулар жөнүндө" кодекстин 115-беренесинин 1-бөлүгүнө ылайык, укук бузган жеке жакка 5 миң 500 сом өлчөмүндө айып салынды.
Ошондой эле таштанды төгүлгөн аймак толугу менен тазаланып, топтолгон калдыктар тиешелүү белгиленген жайга чыгарылды.
Экологиялык кызмат жарандарды айлана-чөйрөнүн тазалыгына жоопкерчилик менен мамиле кылууга, тиричилик калдыктарын атайын белгиленген жайларга гана таштоого жана жаратылышты коргоо талаптарын сактоого чакырды.
