Декларацияланбаган 42 даана алтын буюм үчүн жаран эки эселенген төлөм төлөдү
"Манас" бажысынын кызматкерлери ЕАЭБдин бажы чек арасы аркылуу декларацияланбаган алтын буюмдарды мыйзамсыз өткөрүү аракетине бөгөт коюшту.
Маалыматка ылайык, Түркиядан авиакаттам аркылуу «П.» ЖЧКсынын дарегине келген жүк бажылык кароодон өткөрүлгөн. Элдик керектөө товарларынын арасынан жалпы салмагы 88,97 граммды түзгөн 42 даана алтын буюм табылган.
Текшерүү учурунда зер буюмдардын алуучусу Кыргызстандын жараны экени аныкталган. Ал буюмдарды жеке колдонуу үчүн ортомчу аркылуу сатып алып, карго кызматы менен жеткиргенин билдирген.
Бул факты боюнча Кылмыш-жаза кодексинин 231-беренесинде каралган белгилер аныкталган. Жаран мамлекетке келтирилген зыяндын ордун толтуруу үчүн 408 миң 276 сомду эки эселенген өлчөмдө ыктыярдуу төлөп берген.
Мыйзамга ылайык, бажы төлөмдөрү жана туумдар эки эселенген өлчөмдө толук төлөнгөн учурда адам кылмыш жоопкерчилигинен бошотулат. Ушуга байланыштуу кылмыш ишин козгоого негиздер табылган эмес.
Тактап кетсек, декларация — бажы органдарына товарлар, акча каражаттары же башка баалуулуктар тууралуу расмий маалымат берүү тартиби.
