Алайда дайынсыз болуп жаткан альпинисттердин кимдер экени такталды
Алай районундагы Корумду чокусуна чыгып, дайынсыз болуп жаткан үч альпинисттин аты-жөнү белгилүү болду. Алар тууралуу издөө иштерине каражат чогултуу үчүн ачылган сайтта жарыяланган.
Маалыматка ылайык, альпинисттер 1-августта толук курамда Корумду чокусуна чыгып, акыркы жолу 2-августта байланышышкан. Ал эми 4-августта аларды күтүп турган унаага келишкен эмес.
Дайынсыз болуп жаткан альпинисттер — 43 жаштагы Максим Полянский жана 60 жаштагы Николай Свиридов. Экөө тең Беларустун жарандары жана "Ак илбирс" наамына ээ. Бул наамды бийиктиги 7 миң метрден ашкан беш чокуга чыккан альпинисттер алышат.
Үчүнчү альпинист — Литванын жараны Сергей Рубцов. Ал 37 жашта. Буга чейин да бир нече тоо жүрүшүнө катышкан.
Учурда Өзгөчө кырдаалдар министрлигинин кызматкерлери альпинисттерди дрондордун жардамы менен издеп жатышат.
