Өлкө боюнча беш айда 666 ымыркай чарчап калды
Кыргызстанда 2026-жылдын январь–май айларында бир жашка чейинки 666 бала чарчап калган. Бул тууралуу Улуттук статистика комитетинин баяндамасында маалымдалган.
Маалыматка ылайык, каза болгон балдардын 448и перинаталдык мезгилде пайда болгон оорулардын, ал эми 113ү тубаса өнүгүү кемтиктеринин кесепетинен чарчап калган. Калган учурлар жугуштуу жана мите оорулар, нерв системасынын оорулары жана башка себептер менен байланыштуу болгон.
Ушуга байланыштуу Саламаттык сактоо министрлиги 2030-жылга чейин перинаталдык кызматты реформалоону көздөп жатат. Анда кош бойлуу аялдарды көзөмөлдөөнү жана бейтаптарды тиешелүү медициналык мекемелерге багыттоону жакшыртуу, төрөткө чейинки жардам көрсөтүү тартиптерин кайра карап чыгуу, жаңы скрининг технологияларын киргизүү каралган.
Ошондой эле генетикалык лаборатория түзүү жана үй-бүлөнү пландаштыруу кызматтарын өнүктүрүү боюнча иштер аткарылары айтылган.
Эске салсак, 2025-жылы Кыргызстанда 140 миңден ашуун бала төрөлгөн. Былтыркы жылдын ушул эле мезгилинде, тагыраагы, беш айда 675 ымыркай каза болгон.
