Коом

Балдар онкологиясы борборуна 24 млн сомдук жабдуулар берилди

Уулжан Бейшенбекова

11 авг 2026 17:18

Кыргызстанда балдарга сөөк чучугун трансплантациялоого шарт түзүү үчүн Эне жана баланы коргоо улуттук борборуна жалпы баасы 24 млн сомдон ашкан медициналык жабдуулар тапшырылды. Бул тууралуу Саламаттык сактоо министрлиги билдирди.

Жабдууларды "Ас-Сафа" коомдук кайрымдуулук фонду борбордун Балдар онкологиясы жана гематологиясы бөлүмүнө берди. Алардын катарында аферез аппараты жана экстракорпоралдык фотоферез (ECP) тутуму бар.

Жаңы жабдуулар оор онкологиялык жана гематологиялык оорулары бар балдарды дарылоонун мүмкүнчүлүктөрүн кеңейтүүгө жол ачат. Ошондой эле алар Кыргызстанда гемопоэздик өзөк клеткаларын трансплантациялоо программасын өнүктүрүүдө колдонулат.

11-августта саламаттык сактоо министри Дамир Осмонов борборго барып, жаңы жабдуулар менен таанышты.

Министр "Ас-Сафа" кайрымдуулук фондуна жана балдар онкологиясы менен трансплантациялык программаны өнүктүрүүгө көмөк көрсөтүп жаткан өнөктөштөргө ыраазычылык билдирди.

Кыргызстандын экономика, бизнес, финансы тармактары боюнча маалыматтарды, ийгиликтүү ишкерлер менен болгон кызыктуу маектерди – Ишкер MEDIA сайтынын Telegram, Facebook, Instagram, Threads, Х жана YouTube каналдарынан окуп, көрүп туруңуздар. Ишкер MEDIA менен Сиз ийгиликке жетишесиз!