Дүйнөлүк көчмөндөр оюндары: ачылыш аземине билет баасы 5 миң сомдон башталат
31-августта "Бишкек Аренада" өтө турган Дүйнөлүк көчмөндөр оюндарынын ачылыш аземине билеттер сатыла баштады. Бул тууралуу Президенттин Иш башкармалыгы билдирди.
Билеттерди ticket.gov.kg расмий сайтынан сатып алууга болот. Алардын баасы орунга жараша 5 миңден 9 миң сомго чейин деп белгиленген.
Маалыматка ылайык, ачылыш аземине көрүүчүлөрдүн жеке автоунаа менен баруусуна уруксат берилбейт. Анын ордуна Бишкек шаарындагы атайын белгиленген 22 чекиттен "Бишкек Аренага" акысыз трансфер уюштурулат.
Автобустар 13:00дөн 15:00гө чейин каттайт. Акыркы автобус саат 15:00дө жөнөйт. Трансфер экспресс-маршрут боюнча жүрүп, жолдо токтобойт.
Иш-чара аяктагандан кийин көрүүчүлөр автобуска түшкөн чекитке кайра жеткирилет. Бул үчүн маршрутунун номери жана баштапкы жөнөө дареги көрсөтүлгөн автобуска отуруу зарыл.
Ошондой эле ачылыш аземине 7 жаштан жогору көрүүчүлөр киргизилет. Билетти башка адамга өткөрүп берүүгө же кайра сатууга болбойт. Иш-чарага кирүү Face ID технологиясы аркылуу жүргүзүлөт.
31-августтагы иш-чарага чет мамлекеттердин башчылары да катышкандыктан, коопсуздук чаралары күчөтүлөт.
Белгиленгендей, бул иш-чара "Бишкек Арена" стадионунун расмий ачылышы болуп саналбайт. Анын расмий ачылышы 5-октябрда чоң шоу-концерт менен өтүп, ага кирүү кыргызстандыктар үчүн акысыз болот. Иш-чара тууралуу кошумча маалымат кийин берилет.
