Дүйнөлүк мааниге ээ Мадыген аймагына арналган эл аралык иш-чара өтүп жатат
11-августта Баткен облусунда "Мадыген: дүйнөлүк маанидеги палеонтологиялык кенч" аттуу эл аралык талаа симпозиуму өтүп жатат. Бул тууралуу президенттин аймактагы өкүлчүлүгүнөн билдиришти.
Маалыматка ылайык, симпозиумда Мадыгендин дүйнөлүк палеонтологиядагы орду, аймактын уникалдуу табигый мурасын сактоо жана эл аралык илимий кызматташтыкты өнүктүрүү маселелери талкууланууда.
Симпозиумга Баткен облусунун жетекчилигинин, мамлекеттик мекемелердин өкүлдөрү, кыргызстандык жана чет өлкөлүк окумуштуулар, адистер жана изилдөөчүлөр катышууда. Алардын арасында Алматыдагы К.И. Сатпаев атындагы Геология илимдери институтунун өкүлдөрү да бар.
Иш-чарада Мадыгендин илимий жана туристтик мүмкүнчүлүгүн жогорулатуу, геотуризмди өнүктүрүү боюнча пикирлер айтылды. Ошондой эле аймак дүйнөлүк маанидеги палеонтологиялык мурас катары бааланып, дүйнөлүк баалуулуктар тизмесине киргендиги белгиленди.
Симпозиумдун уюштуруучулары — Улуттук илимдер академиясынын Геология жана палеонтология институту, Тянь-Шань геологиялык коому жана "Мадыген Геопарк" коомдук фонду.
Тактап кетсек, палеонтология — казылып алынган калдыктар жана тиричилик аракеттеринин издери боюнча өткөн доордогу жаныбарларды жана өсүмдүктөрдү изилдөөчү илим.
