Коомдук талкуу: рулу оңдон солго которулган унааларды каттоо сунушталды
Кыргызстанда рулу оң жактан сол жакка которулган унааларды каттоого мүмкүнчүлүк берүү сунушталууда. Бул тууралуу Экономика жана коммерция министрлиги билдирип, тиешелүү токтом долбоорун коомдук талкууга чыгарды.
Сунушка ылайык, рулу оң жактан сол жакка жылдырылган автоунаалар легалдаштырууга жатпаган транспорт каражаттарынын тизмесинен чыгарылат. Мындай унаалардын ээлери каттоодон өтүү үчүн техникалык экспертизанын корутундусун алууга тийиш болот.
Техникалык экспертизаны Ички иштер министрлигинин Жол кыймылынын коопсуздугун көзөмөлдөө башкы башкармалыгына караштуу "Техникалык көзөмөл борбору" жүргүзөт. Унаанын техникалык абалы талаптарга жооп берери аныкталган учурда гана аны каттоого жөнөтүүгө уруксат берилет.
Министрликтин маалыматына караганда, учурда Кыргызстанда мындай талапка туура келген 50гө жакын автоунаа бар.
Белгилей кетсек, Кыргызстанда чет өлкөлүк мамлекеттик номер менен жүргөн унааларды легалдаштыруунун биринчи этабы 2025-жылдын 1-апрелинен 1-октябрына чейин өткөн. Экинчи этап 2026-жылдын 10-июнунда башталып, 1-сентябрга чейин уланат.
