Ысык-Көлдө 30 миң доллар опузалоого шектелген эки жаран кармалды
Ысык-Көл районунун Ананьево айылында 30 миң долларды опузалап талап кылууга шектелген эки жаран кармалды. Бул тууралуу Ички иштер министрлигинин басма сөз кызматы билдирди.
Маалыматка ылайык, шектүүлөр аянты 10 гектар болгон жер тилкесин пайдалануу укугу боюнча мыйзамдуу негизде сынактан утуп чыккан жарандан акча талап кылган деп шектелүүдө.
Тергөө-ыкчам иш-чараларынын жүрүшүндө тиешелүү келишимди атайылап түзбөй, жеке кызыкчылыктарын көздөп, жабырлануучудан 30 миң доллар талап кылган деген шек менен Ысык-Көл токой чарбасынын инженери, 1979-жылы туулган Т.Б. жана 1969-жылы туулган К.Д. аттуу жаран кармалган.
ИИМдин маалыматына караганда, К.Д. уюшкан кылмыштуу топтун мүчөсү катары көрсөтүлүүдө. Кармалгандар Тергөө кызматына жеткирилип, убактылуу кармоочу жайга киргизилген.
Бул факты боюнча Кылмыш-жаза кодексинин 208-беренеси ("Опузалап талап кылуу") менен кылмыш иши козголгон. Сот шектүүлөргө карата эки айга камакка алуу боюнча бөгөт коюу чарасын тандаган.
Учурда тергөө иштери улантылып, окуянын бардык жагдайлары такталууда.
