Баткенде Кожо-Ашкан дарыясына агып кеткен жаран изделип жатат
Баткен районунда Кожо-Ашкан дарыясына агып кеткен 48 жаштагы эркек кишини издөө иштери улантылууда. Бул тууралуу Өзгөчө кырдаалдар министрлигинин Баткен облусундагы башкармалыгынын басма сөз кызматы билдирди.
Алдын ала маалыматка ылайык, 10-августта саат 18:00 чамасында Баткен районунун Төрт-Гүл айыл аймагына караштуу Чоң-Кара айылынын Кожешкен жерлигинде 48 жаштагы эркек киши Кожо-Ашкан дарыясына агып кеткен.
11-августта жаранды издөө иштерине ӨКМдин Баткен облусундагы башкармалыгынын, ИИМдин кызматкерлери жана жергиликтүү тургундардан жалпы 24 адам тартылган.
Бүгүн издөө иштерине Баткен району боюнча ӨКБнүн №106 ӨКБдан 11 куткаруучу, №26 ӨКБдан 5 куткаруучу, РӨКОнун №3 ӨИКОдан 9 куткаруучу, ИИМдин 12 кызматкери жана жергиликтүү тургундардан 15 адам катышууда.
Мындан тышкары, издөө иштерине ИИМден 2, ӨКМден 1 дрон тартылып, жалпы үч дрон колдонулууда.
Белгиленгендей, жаранды издөө иштери улантылып жатат. Кошумча маалымат берилет.
