Борбордогу 20 мектептин курулушун күн сайын көзөмөлдөө тапшырылды
Курулуш, архитектура жана турак жай-коммуналдык чарба министри Нурдан Орунтаев борбор калаада курулуп жаткан 20 мектептин курулушунун жүрүшү боюнча жыйын өткөрдү. Бул тууралуу министрликтин басма сөз кызматы билдирди.
Маалыматка ылайык, жыйынга подрядчы уюмдардын жана министрликтин тиешелүү департаменттеринин өкүлдөрү катышты. Анда ар бир мектеп боюнча аткарылган иштер, курулуштун темпи жана алдыда аткарыла турган иштердин көлөмү каралды.
Белгиленгендей, жыл башында президент Садыр Жапаровдун тапшырмасы менен окуучулардын саны көп болгон Бишкек, Ош жана Манас шаарларында жалпысынан 36 мектеп куруу милдети коюлган. Анын ичинен Бишкек шаарындагы 20 мектептин курулушу 2026-жылдын февраль–март айларында башталган.
Учурда мектептерде курулуш иштери акыркы баскычка чыгып, имараттардын сырткы жасалгасы жана инженердик тармактар орнотулуп жатат.
Министр Нурдан Орунтаев курулуш иштеринин жүрүшү тууралуу күн сайын так маалымат берилип, аткарылган иштердин фото жана видео отчеттору өз убагында жөнөтүлүшү керектигин белгиледи.
Мындан тышкары, министрликтин тиешелүү департаменттерине объектилердеги курулуш иштеринин сапатын, долбоордук талаптардын жана коопсуздук эрежелеринин сакталышын көзөмөлдөөнү тапшырды.
