Кара-Алмадагы эс алуу жайларында экологиялык талаптар бузулганы аныкталды
Кара-Алма айылындагы эс алуу жайларында экологиялык талаптардын бузулушу аныкталып, эки жайдын жооптуу өкүлдөрүнө жалпы 15 500 сом айып салынды. Бул тууралуу Жаратылыш ресурстары министрлигинин Жалал-Абад регионалдык башкармалыгы билдирди.
Маалыматка ылайык, башкармалыктын кызматкерлери эс алуу жайларында экологиялык талаптардын сакталышын текшерүү үчүн рейд өткөрүшкөн.
Текшерүүнүн жүрүшүндө "Чарпая" эс алуу жайынан чыккан тиричилик калдыктары белгиленбеген жерге ташталганы аныкталган. Бул факты боюнча жооптуу тарапка протокол түзүлүп, 5 500 сом айып пул салынды.
Ал эми "Жолдош Ата" эс алуу жайында саркынды суулардын жер үстүнө агып чыгып жатканы аныкталып, 10 миң сом өлчөмүндө айып салынды.
Мындан тышкары, рейддин алкагында жалпы 12 эс алуу жайынын жетекчилигине экологиялык талаптарды сактоо боюнча эскертүү каттары берилди.
Текшерүүнүн жүрүшүндө аныкталган башка мыйзам бузуулар боюнча да мыйзам чегинде тиешелүү чаралар көрүлдү.
