Манас шаарында өспүрүмдөрдүн иштөөсүнө көзөмөл күчөтүлдү
Манас шаарында өспүрүмдөрдүн эмгекке мыйзамсыз тартылышын алдын алуу максатында "Эмгек–өспүрүм" аталышындагы рейд өттү. Бул тууралуу мэриянын басма сөз кызматы билдирди.
Маалыматка ылайык, устаканалар, кафе-ашканалар, базарлар жана башка соода-тейлөө жайлары текшерилип, жашы жете элек балдардын эмгекке тартылышы көзөмөлдөнүүдө.
Мындан тышкары, өспүрүмдөр жана алардын ата-энелери менен түшүндүрүү иштери жүргүзүлүп, балдардын укуктары, коопсуздугу жана эмгек шарттарына байланыштуу маалыматтар берилип жатат.
Рейддин жүрүшүндө мыйзам бузуу фактылары аныкталып, тиешелүү протоколдор түзүлүп, айрым учурларда айып пулдар салынды.
Манас шаардык мэриясынын маалыматына ылайык, алдын алуу иш-чаралары өспүрүмдөрдүн укуктарын коргоо жана алардын коопсуздугун камсыз кылуу максатында улантылат.
