Салык карызынын 97%ы эсептен чыгарылат: кимдерге жеңилдик берилди?
Кыргызстанда айрым салык төлөөчүлөргө салык карыздарын, туум жана санкцияларды эсептен чыгарууга мүмкүнчүлүк берген жаңы мыйзам кабыл алынды. Бирок жеңилдиктер автоматтык түрдө колдонулбайт, мыйзамда белгиленген шарттарды аткаруу талап кылынат.
Салык кызматынын басма сөз кызматы маалымдагандай, мал экспорттоочулардын 2026-жылдын 1-январына чейинки салык карызынын 97%ы, ошондой эле туум жана санкциялардын 100%ы эсептен чыгарылат. Бул үчүн калган 3% негизги карызды төлөө зарыл.
Баткен облусунда турак үй курган ишкерлердин тиешелүү документтери болсо, салык карызы, туум жана санкциялары толугу менен эсептен чыгарылат.
Көмүр тармагындагы ишканалардын 2026-жылдын 1-январына чейин эсептелген туум жана санкциялары да эсептен чыгарылат. Мында негизги карызды 31-декабрга чейин төлөө шарт.
Мындан тышкары, 2026-жылдагы кыймылсыз мүлк салыгынын негизги суммасы толук төлөнсө, ага эсептелген туум жана санкциялар эсептен чыгарылат.
Толук маалыматты Салык кызматынын расмий сайтынан алууга болот.
