Сузак жана Өзгөндө 742 гектар жердин көчөт отургузууга ылайыктуулугу бааланат
Сузак жана Өзгөн райондорундагы 2027-жылы токой жана мөмө-жемиш көчөттөрү отургузула турчу аймактарга социалдык-экологиялык скрининг жүргүзүлүүдө. Бул тууралуу БУУнун Азык-түлүк жана айыл чарба уюмунун Кыргызстандагы өкүлчүлүгү билдирди.
Маалыматка ылайык, иштер БУУнун Жашыл климаттык фонддун каржылоосундагы CS-FOR долбоорунун алкагында ишке ашырылып, жалпысынан 742,82 гектар жер алдын ала бааланат.
Белгиленгендей, скринингдин негизги максаты — сунушталган жерлердин көчөт отургузууга ылайыктуулугун баалоо, мүмкүн болуучу экологиялык жана социалдык тобокелдиктерди аныктоо жана аларды алдын алуу боюнча чараларды белгилөө.
Талаа иштерине ФАОнун адистери, токой чарбаларынын, айыл өкмөттөрүнүн, райондук мамлекеттик администрациялардын жана Жаратылышты башкаруу жамааттык топторунун өкүлдөрү катышууда.
Алар жерлердин абалын, суу менен камсыз болуу мүмкүнчүлүгүн, жергиликтүү калктын жер пайдалануусун жана көчөттөрдү отургузууга даярдыкты баалап жатышат.
Анын ичинде Сузак районунда 471,12 гектар, Өзгөн районунда 271,70 гектар жерге баа берилет.
Адистердин айтымында, скринингдин жыйынтыгы 2027-жылдагы өсүмдүк отургузууга артыкчылыктуу аймактарды аныктоого, жергиликтүү бийлик органдары жана токой чарбалары менен иш-чараларды макулдашууга, ошондой эле мүмкүн болуучу тобокелдиктерди алдын алууга шарт түзөт.
