Сузакта кытайлык жарандар жашаган үйдө экологиялык мыйзам бузуулар катталды
Барпы айыл аймагындагы Чангет-Сай айылында экологиялык абал боюнча текшерүүлөр жүргүзүлүп, бир катар мыйзам бузуулар аныкталды. Бул тууралуу Жалал-Абад облусундагы өкүлчүлүктөн билдиришти.
Маалыматка ылайык, А. Нышанбаев көчөсүндө убактылуу жашап жаткан кытайлык жарандар пайдаланган турак үйдөн чыккан саркынды суулар арыкка агызылып жатканы аныкталды.
Турак жайдын ээсине экологиялык талаптарды бузгандыгы үчүн айып пул салынып, протокол түзүлдү. Ошондой эле саркынды сууларды агызуу тутумун үч күндүн ичинде талапка ылайык келтирүү милдети коюлду.
Мындан тышкары, Кыргыз–Кытай–Өзбекстан темир жолунун өкүлдөрүнө да экологиялык талаптарды бузгандыгы үчүн айып пул салынып, мыйзам бузууларды толук жоюу жана аймакты мурдагы абалына келтирүү үчүн 10 күндүк мөөнөт берилди.
Учурда темир жолдун өкүлдөрү аймакты калыбына келтирүү иштерин жүргүзүп жатышат.
Ошондой эле Сафаровка–Балыкчы унаа жолунун курулушунда иштеген чет өлкөлүк жумушчулар жашаган үйлөрдүн санитардык жана экологиялык абалы текшерилүүдө.
Мыйзам талаптарына жооп бербеген жайларды бошотуу жана көчүрүү боюнча тиешелүү чаралар көрүлүп жатат.
