Баткенде 193,9 млн сомдук долбоор: 75 орундуу балдар ооруканасы курулат
Баткен шаарындагы Чет-Булак аймактык башкармалыгында 75 орундуу балдар ооруканасынын курулушуна мезгил кутусу салынды. Бул тууралуу аймактык өкүлчүлүктүн басма сөз кызматы билдирди.
Маалыматка ылайык, жаңы балдар ооруканасынын жалпы аянты 2 959,82 чарчы метрди түзөт. Долбоордун жалпы наркы 193 млн 965 миң 441 сом деп көрсөтүлгөн.
Мекемеде УЗИ, ЭКГ, рентген жана флюорография бөлүмдөрү, операциялык, стерилдөө жана медициналык аспаптарды иштетүү бөлмөлөрү, реанимация жана интенсивдүү терапия палаталарды болот. Ошондой эле балдар үчүн оюн аянтчалары жана эс алуу жайлары каралган.
Мындан сырткары, Баткен облусундагы ыйгарым укуктуу өкүл Мамыржан Рахимов президент Садыр Жапаровдун колдоосу менен 2027-жылы 350 орундуу облустук оорукананын курулушун баштоо пландалып жатканын маалымдады.
