Чет өлкөгө ишке орноштуруу: министрлик уруксаты бар агенттиктерди атады
Эмгек, социалдык камсыздоо жана миграция министрлигине караштуу Чет өлкөдө жарандарды ишке орноштуруу борборунда ишке орношууга көмөктөшкөн агенттиктер боюнча жыйын өттү.
Министрликтин басма сөз кызматынын маалыматына ылайык, жыйында 9 агенттикке карата тиешелүү чечимдер кабыл алынды.
Анын ичинен 6 агенттикке чет өлкөдө жарандарды ишке орноштуруу боюнча бир жылдык мөөнөткө уруксат берилди же узартылды:
- "НаРзиЗ Тур" ЖЧКсы — Германия;
- "Шарт Кей Джи" ЖЧКсы — Германия;
- "Марсель-Е Компани" ЖЧКсы — Түркия;
- "Гринвей Груп" ЖЧКсы — Германия;
- "АПГРЕЙД СТАФФ" ЖЧКсы — Орусия;
- "Ворлд трэвел энд ворк" ЖЧКсы — Беларусь.
Мындан тышкары, "Албан Лидердин" Латвиядагы ишмердүүлүгүнө берилген уруксат бир жылдык мөөнөткө шарт менен узартылды.
"Султан Травелге" Польшага жарандарды ишке орноштуруу боюнча уруксат берүү маселеси компаниянын өкүлү жыйынга келбегендигине байланыштуу кийинкиге жылдырылды.
Ал эми "Глобус Кей Джи Плюстун" Орусия багытындагы уруксатын жокко чыгаруу маселеси да кийинкиге калтырылды.
Эмгек, социалдык камсыздоо жана миграция министрлиги расмий каттоодон өткөн жана тиешелүү уруксаты бар агенттиктерине гана кайрылууну, ошондой эле сунушталган жумуштун шарттарын кылдат текшерүүнү эскертти.
