Ноокенде селдин кесепеттерин жоюуга катышкан 348 жаран азык-түлүк алышты
Ноокен районунда селдин кесепеттерин жоюу иштерине катышкан 348 жаранга эмгек акысы катары жалпы 114 тонна азык-түлүк берилди. Бул тууралуу "Өнүктүрүү демилгелеринин агенттиги" уюму билдирди.
Маалыматка ылайык, Дүйнөлүк азык-түлүк программасынын колдоосу менен ишке ашырылып жаткан "Эмгек үчүн азык-түлүк жардам" долбоорунун алкагында 300 килограммдан ун жана 30 литрден өсүмдүк майы берилди.
Долбоордун катышуучулары Өзгөчө кырдаалдар министрлигинин өкүлдөрү жана жергиликтүү бийлик органдары менен биргеликте селден жабыркаган аймактарда тазалоо жана калыбына келтирүү иштерин жүргүзүшкөн.
Атап айтканда, Кочкор-Ата жана Майлуу-Суу шаарларында, ошондой эле Момбеков айыл аймагында көчөлөр, социалдык объектилер жана сугат тармактары тазаланып, оңдолгон.
Белгилей кетсек, июлда нөшөрдөн улам Жалал-Абад облусунун бир катар аймактарында сел жүрүп, жергиликтүү инфратүзүмгө жана турак жайларга олуттуу зыян алып келген.
