Өзбекстандан келген 28 тонна жашылча Кыргызстанга киргизилген жок
Өзбекстандан Кыргызстанга келаткан 23 тонна пияз жана 5 тонна сабиз "Кызыл-Кыя автожолу" фитосанитардык текшерүү постунан артка кайтарылды. Бул тууралуу Айыл чарба министрлигинин басма сөз кызматы билдирди.
Текшерүү учурунда жашылча-жемиштердин таңгагында милдеттүү эн белги жок экендиги аныкталган.
Адистердин айтымында, азыктарды тиешелүү белгисиз алып кирүү Евразия экономикалык биримдигинин (ЕАЭБ) бирдиктүү карантиндик-фитосанитардык талаптарын бузуу болуп саналат.
Ушуга байланыштуу жалпы көлөмү 28 тоннаны түзгөн жүк импорттоочу өлкөгө кайра кайтарылган.
Тиешелүү мамлекеттик орган мамлекеттик чек арадагы фитосанитардык коопсуздукту камсыздоо жана карантиндик талаптардын сакталышын көзөмөлдөө иштерин улантууда.
