"Сары-Челек" коругунда жаңы өткөрмө бекети курула баштады
"Сары-Челек" мамлекеттик биосфералык коругунда өткөрмө бекетинин пайдубалына мезгил кутусу салынды. Бул тууралуу Жаратылыш ресурстары министрлигинин басма сөз кызматы билдирди.
Маалыматка ылайык, ачылыш аземге Жаратылыш ресурстары, экология жана техникалык көзөмөл министринин биринчи орун басары Жеңиш Сейдалиев, коруктун кызматкерлери, жергиликтүү өз алдынча башкаруу органдарынын өкүлдөрү жана жаратылышты коргоо тармагынын ардагерлери катышты.
Жаңы өткөрмө пунктунун курулушу коруктун инфратүзүмүн жакшыртууга, аймакка кирип-чыгууну көзөмөлдөөнү күчөтүүгө жана келгендер үчүн ыңгайлуу шарттарды түзүүгө багытталган.
Аземден кийин "Сары-Челекти" мындан ары өнүктүрүү боюнча жетекчилик менен биргеликте алдыдагы пландар талкууланды.
Белгилей кетсек, "Сары-Челек" мамлекеттик биосфералык коругу — Кыргызстандын уникалдуу жаратылыш аймактарынын бири. Коруктун аймагы көлү, тоолуу токойлору жана өсүмдүктөр менен жаныбарлар дүйнөсүнүн бай түрдүүлүгү менен өзгөчөлөнөт.
