Унааны жасалма документ менен каттоого аракет кылган 4 шектүү кармалды
Чүйдө жасалма документтерди колдонуп, чет өлкөдөн келген унааны мыйзамсыз каттоого аракет кылган 4 жаран кармалды. Бул тууралуу Чүй облустук ички иштер башкармалыгынын басма сөз кызматы билдирди.
Маалыматка ылайык, 3-июлда 1995-жылы туулган К.Д. аттуу жаран Сокулук-Москва райондук каттоо бөлүмүнө "Belgee X50" үлгүсүндөгү автоунааны мамлекеттик каттоодон өткөрүү үчүн кайрылган. Унаа Казакстандан Кыргызстанга алып келингени көрсөтүлгөн.
Бирок каттоо учурунда берилген документтердин жасалма экендиги аныкталган. Текшерүүнүн жүрүшүндө автоунаа буга чейин Орусияда каттоодо турганы жана лизингде болгону белгилүү болгон.
Ошондой эле унаага байланыштуу жасалма каттоо күбөлүгү, сатып алуу-сатуу келишими, ишеним жана коштомо каттар даярдалып, Кыргызстанга жеткирилгени аныкталган.
Бул факты боюнча Кылмыш-жаза кодексинин 379-беренесинин 3-бөлүгү менен кылмыш иши козголгон.
Тергөө учурунда кылмышка шектүү катары 1995-жылы туулган К.Д., 1990-жылы туулган К.К., 2001-жылы туулган К.И. жана 1994-жылы туулган Э.Б. кармалды.
Алар Жазык-процесстик кодекстин 96-беренесине ылайык убактылуу кармоочу жайга киргизилди.
Учурда окуянын бардык жагдайларын аныктоо жана кылмышка тиешеси бар башка адамдарды табуу боюнча тергөө жүргүзүлүп жатат.
