Кызыл-Кыштакта тургундардын бир катар маселелери каралды
Ош шаарынын мэри Жанарбек Акаев Кызыл-Кыштак айылындагы Алишер Навои көчөсүнүн тургундары менен жолугушту. Бул тууралуу калаа мэриясынын басма сөз кызматы билдирди.
Маалыматка ылайык, аталган айылдык аймактык башкармалыгына шаар башчысы тиешелүү мекеме-ишканалардын жетекчилери менен биргеликте барган.
Жолугушууда тургундарды түйшөлткөн бир катар маселелер талкууланды. Анын ичинде кенемте боюнча кеңири түшүндүрмө берилди.
Мындан тышкары, жол жана инженердик инфратүзүм, коммуналдык кызматтар жана башка социалдык маанидеги маселелер боюнча тургундардын кайрылууларын угушту.
Ошондой эле мэр учурда жүрүп жаткан Сулайман-Тоонун айланасын жакшыртуу жана калыбына келтирүү иштери тууралуу тургундар үчүн кошумча маалымат берүү боюнча тапшырма берди.
Жолугушуунун жыйынтыгында тургундардын сунуш-пикирлери эске алынып, көтөрүлгөн маселелерди чечүү боюнча мындан аркы иштердин багыттары аныкталганы айтылды.
