Мамлекеттик маанидеги иш-чаралар учурунда айрым жолдор жабылат
29-августтан 6-сентябрга чейин мамлекеттик маанидеги иш-чараларга байланыштуу Бишкек шаарынын, Чүй жана Ысык-Көл облустарынын аймагындагы айрым жол тилкелеринде унаа кыймылы убактылуу чектелет. Бул тууралуу Ички иштер министрлигинин басма сөз кызматы билдирди.
Маалыматка ылайык, ушул күндөрү ички иштер органдарынын кызматкерлери күчөтүлгөн тартипте кызмат өтөшөт. Алар коомдук тартипти сактоого, жол кыймылынын коопсуздугун камсыз кылууга жана мүмкүн болуучу укук бузуулардын алдын алууга өзгөчө көңүл бурат.
Айрым жол тилкелеринде транспорт каражаттарынын кыймылы мезгил-мезгили менен убактылуу жабылышы мүмкүн.
Милиция жарандарга киргизилген чектөөлөргө түшүнүү менен мамиле кылып, жол тыгындарына кабылбоо үчүн каттамдарын алдын ала ойлонуштурууну сунуштады.
Ошондой эле айдоочулардан жол кыймылын тескөөчүлөрдүн мыйзамдуу талаптарын так сактоону өтүнүштү.
