Баткендин тазалык жана көрктөндүрүү кызматына 5 атайын техника берилди
Баткен шаарында муниципалдык кызматтардын материалдык-техникалык базасын чыңдоо максатында атайын техникаларды тапшыруу аземи болуп өттү. Бул тууралуу аймактык өкүлчүлүктөн билдиришти.
Маалыматка ылайык, жаңы техникалар Баткен облусун өнүктүрүү фондунун каржылоосу менен Мамлекеттик лизинг компаниясы аркылуу алынган.
Алардын катарында эки экскаватор, фронталдык жүктөгүч, "Hyundai Porter" үлгүсүндөгү жүк ташуучу унаа жана "Желмаян" атайын техникасы бар.
Техникалар Баткен шаардык муниципалдык автобазасына өткөрүлүп берилип, шаарды көрктөндүрүү, тазалык иштерин жүргүзүү, жолдорду оңдоо жана башка муниципалдык иштерде пайдаланылат.
Иш-чарада белгиленгендей, жаңы техникалардын ишке кириши шаардык кызматтардын мүмкүнчүлүгүн кеңейтип, иштерди өз убагында жана сапаттуу аткарууга шарт түзөт.
