Чек ара кызматынын кызматкерлери кармалды

УКМКнын кызматкерлери 16-августта ыкчам-иликтөө иш-чараларынын жүрүшүндө “Ак-Тилек автожол” өткөрмө пункту аркылуу жүк ташуучу автотранспорт каражаттарын мыйзамсыз өткөрүп турган туруктуу коррупциялык топтун ишмердүүлүгүнө бөгөт койду.

Мамлекеттик Чек ара кызматынын ЕАЭБ боюнча башкармалыгынын кызмат адамдары акчалай сый акы үчүн коммерциялык жүктөрдү ташыган оор жүк ташуучу унаалардын Кыргызстандын аймагына тоскоолдуксуз кирүүсүн камсыздап, ошол эле учурда расмий документтерде аларды бош унаалар катары катташкан.

Тергөөнүн жыйынтыгы боюнча мамлекеттик Чек ара кызматынын аскер кызматкери Э.у.Ч., МСКнын ЕАЭБ боюнча башкармалыгынын Түндүк аймактык кызматкерлери Ж.М.Т. жана О.К.И., ошондой эле оор жүк ташуучу автотранспорттун айдоочусу Н.М.С. 96-беренеге ылайык кармалып, УКМКнын тергөө абагынын убактылуу кармоочу жайына киргизилди.

Учурда иштин бардык жагдайларын жана ага тиешеси бар адамдарды аныктоого багытталган зарыл болгон ыкчам-тергөө иш-чаралары жүргүзүлүүдө.