Новопокровкадагы мурдагы оорукана 100 орундуу жаңы төрөт үйүнө айланат
Ысык-Ата районундагы Новопокровка айылындагы мурдагы оорукананын имаратында жүрүп жаткан оңдоп-түзөө иштери бүткөн соң, ал жерге 100 орундуу облустук төрөт үйү жайгаштырылат. Бул тууралуу Саламаттык сактоо министрлигинин билдиришти.
Маалыматка ылайык, мартта саламаттык сактоо министри Дамир Осмонов аталган мекемеге барып, долбоорду ишке ашыруунун жүрүшү менен таанышкан.
Бүгүнкү күндө имаратты оңдоо иштери акыркы баскычка жетти. Учурда фасаддык иштердин басымдуу бөлүгү аткарылып, жаңы терезелер орнотулду. Имараттын ичинде жасалгалоо иштери улантылууда.
Мындан тышкары, инженердик коммуникацияларды жана желдеткичтерди орнотуу, шыпты жаңылоо жана имаратты пайдаланууга даярдоо үчүн зарыл болгон башка иштер жүргүзүлүп жатат.
Белгиленгендей, долбоор толук ишке ашырылгандан кийин жаңы төрөт үйү Чүй облусунун тургундарына медициналык кызмат көрсөтүүнүн сапатын жогорулатууга жана энелер менен ымыркайларга ыңгайлуу шарт түзөт.
