Майданда канал оңдоого катышкандарга азык-түлүк жана 1800 сомдон берилет
Баткен облусунун Майдан айылында сууну натыйжалуу пайдалануу жана климаттын өзгөрүшүнө ыңгайлашуу багытында бир катар иштер жүргүзүлүүдө. Бул тууралуу "Өнүктүрүү демилгелер агенттиги" коомдук фонду билдирди.
Маалыматка ылайык, долбоордун алкагында аймактагы негизги суу булагы болгон "Бант суусу" каналынын 1320 метрин оңдоо каралган. Учурда курулуш иштерине 55 жергиликтүү тургун катышууда.
Долбоорду ишке ашырууга БУУнун Өнүктүрүү жана Азык-түлүк программасы колдоо көрсөтүүдө. Алар керектүү жабдууларды сатып алууга, ошондой эле жумушчуларга азык-түлүк берүүгө көмөктөшүшөт. Тактап айтканда, ар бир катышуучу 300 кг ун жана 30 литр өсүмдүк майын алат.
Мындан тышкары, Эмгек, социалдык камсыздоо жана миграция министрлигинин райондук башкармалыгы ар бир жаранга 1800 сомдон акчалай төлөм бөлөт.
Мындан тышкары, долбоордо аялдарды колдоого да көңүл бурулуп, 15 айым сууну үнөмдөөчү технологиялар боюнча окуп жатат. Ал эми 4 аялга тамчылатып сугаруу тутумун орнотуу үчүн гранттык жардам берилди.
Тактап кетсек, деңиз деңгээлинен 1400 метр бийиктикте жайгашкан айылда 1670 адам жашаган 320 кожолук бар. Алардын кирешеси негизинен сугат суусуна көз каранды. Айылдагы сугат жерлердин жалпы аянты 210 гектарды түзөт.
