Нарын облусунда Эгемендүүлүктүн 35 жылдыгы кандай белгиленет?
Эгемендүүлүгүнүн 35 жылдыгына карата Нарын облусунда маданий, спорттук жана салтанаттуу иш-чаралар өтөт. Бул тууралуу аймактык өкүлчүлүктүн басма сөз кызматы билдирди.
Маалыматка ылайык, Нарын шаарында негизги иш-чаралар Турдакун Усубалиев атындагы борбордук аянтта өтүп, анда майрамдык салтанат жана күндүзгү концерттик иш-чара уюштурулат.
Ал эми Жээк аллеясында шаар тургундары жана коноктору үчүн кечки маданий программа тартууланат.
Ошондой эле Нарын шаарынын мэринин өтмө кубогу үчүн спорттун 5 түрү боюнча мелдештер өтүп, улуттук оюндар ойнолот.
Майрамдык иш-чаралар райондордо да уюштурулат:
- Жумгал районунун Чаек айылындагы Ш. Исабекова атындагы эс алуу жайында;
- Кочкор районундагы Ормон Хан атындагы сейил багында;
- Ат-Башы айылында;
- Баетов айылындагы “Дөрбөлжүн” аянтында.
Эске салсак, негизги республикалык майрамдык иш-чаралар Талас облусунда өтөт.
