Талас: Кеңешбек Нуржанов аллеясында китепкана жана спорттук аянтчалар орун алат
18-августта Талас облусундагы ыйгарым укуктуу өкүл Эрмат Жумаев тиешелүү ишканалардын жетекчилери менен бирге Талас шаарында курулуп жаткан аллеядагы иштердин сапатын текшерди. Бул тууралуу аймактык өкүлчүлүктөн билдиришти.
Эрмат Жумаевдин айтымында, президент Садыр Жапаровдун колдоосу жана тапшырмасынын негизинде Кеңешбек Нуржанов аллеясы толугу менен жаңыланып, заманбап эс алуу багына айланууда.
Жаңыланган аллея Эгемендүүлүктүн 35 жылдыгын белгилөөгө арналган салтанаттуу иш-чарада президенттин катышуусунда пайдаланууга берилери белгиленди.
Долбоорго ылайык, аймакта эс алуучу жайлар, китепкана, спорт менен машыгууга арналган воркаут аянтчалары, Wi-Fi бурчу, оргума жана башка заманбап жайлар каралган.
Белгиленгендей, жаңыланган аллея калаанын борбордук бөлүгүнүн көркүн ачып, шаар тургундары, туристтер жана аймакка келген меймандар үчүн ыңгайлуу эс алуу шарттарын түзүүгө багытталган.
