Аскат Жетиген эркиндикке чыкты
Акын Аскат Жетиген 19-августта абактан эркиндикке чыкты. Бул тууралуу укук коргоочу Гүлшайыр Абдрасулова билдирди.
Аскат Жетиген 2024-жылы бийликти соцтармак аркылуу сындап чыккандан кийин кармалып, ага эки кылмыш иши козголгон. Свердлов райондук соту “Бийликти басып алууга чакырык жасоо” беренеси менен күнөөлүү деп таап, үч жылга эркинен ажыратып, “Жапырт башаламандыктарга чакыруу” беренеси менен актаган. Бишкек шаардык соту жана Жогорку сот бул чечимди күчүндө калтырган. Аскат Жетиген кармалган күндөн баштап күнөөсү жоктугун айтып келет.
Аскат Жетиген ырчы, комузчу, обончу, композитор, акын. Ал 18 жашында “Ордо Сахна” фольклордук-этнографиялык ансамблине жетекчи болуп, бир нече жыл аны менен жыйырмадан ашык өлкөнү кыдырган. 2021-жылы өзүнүн чакан концертин өткөргөн. Анын “Зарыкканда” жана башка бир канча ыры эл арасында белгилүү.
