Бишкекте 31-август жана 1-сентябрда бир катар соода борборлору жабылат
Бишкекте 31-август жана 1-сентябрда расмий делегациялар өтүүчү маршруттарда жайгашкан бир катар соода борборлорунун иши убактылуу токтотулат. Мындай чечим укук бузуулардын алдын алуу боюнча Координациялык комиссиянын 18-августтагы жыйынында кабыл алынды.
Муниципалитеттин маалыматына ылайык, ГУМ "Чынар", ЦУМ "Айчүрөк", "Бишкек Парк", "Азия Молл", "Ала-Арча", "VEFA Центр", "Дом торговли", "Гоин", "Beta Stores 1" жана "Беш Сары Сити" соода борборлорунун иши убактылуу токтотулат.
Мындан тышкары, "Ош базары" жана "Сары-Өзөн" базарлары 31-августта, ошондой эле 1 жана 2-сентябрда иштебейт. "Орто-Сай" базарынын иши 31-августта жана 1-сентябрда убактылуу токтотулат.
Ошондой эле төрт административдик райондун башчыларына расмий делегациялар өтүүчү маршруттардагы кошумча соода түйүндөрүн аныктап, алардын ишин убактылуу токтотууну камсыз кылуу тапшырылды.
Чечимдер Шанхай кызматташтык уюмунун саммитин, Дүйнөлүк көчмөндөр оюндарын жана Эгемендүүлүк күнүнө байланыштуу иш-чараларды өткөрүү учурунда коопсуздукту камсыз кылуу максатында кабыл алынган.
Мындан сырткары, 29-августта саат 15:00дөн тарта шаардагы бир катар жер астындагы жөө жүргүнчүлөр өтмөктөрү жабылат. Эл аралык иш-чаралар учурунда шаардык коммуналдык кызматтар күчөтүлгөн режимде иштеп, коомдук транспорттун үзгүлтүксүз каттамы камсыздалат.
Дүйнөлүк көчмөндөр оюндарынын ачылыш аземине шаар тургундарын жана конокторун жеткирүү үчүн 21 багыт боюнча шаттл-автобустар уюштурулат.
