Июнда 12 миңден ашык үлгү лабораториялык текшерүүдөн өттү
Үстүбүздөгү жылдын июнь айында айыл чарба продукцияларынан карантиндик объекттерди жана жөнгө салынуучу карантиндик эмес зыяндуу организмдерди аныктоо максатында өсүмдүктөрдүн карантини боюнча лабораторияларга жалпы 12 078 үлгү келип түшкөн. Бул тууралуу Айыл чарба министрлигинин басма сөз кызматынан билдиришти.
Анын ичинен:
- импорттук карантинге алынган продукциялардан — 7 005 үлгү;
- экспорттук карантинге алынган продукциялардан — 3 725 үлгү;
- изилдөө иш-чараларынан — 683 үлгү;
- кайрылуулар боюнча — 448 үлгү.
Лабораториялар жалпы 28 767 экспертиза жүргүзүп, карантиндик зыяндуу организмдердин 10 түрүн аныкташкан. Алар: сойломо кекире, сары чырмоок, кызыл карагай мурутчаны, чие чымыны, томат күбөсү, төрт тактуу буурчак коңузу, сабак дат оорусу, алтын түстүү картошка нематодасы, Калифорния калканчысы жана тыт калканчысы.
Өсүмдүктөрдүн карантини боюнча лабораторияларда айыл чарба продукцияларына зыянкечтерди, илдеттерди, отоо чөптөрдү жана нематодаларды аныктоо боюнча экспертизалар жүргүзүлөт.
Лабораториялык изилдөөлөр карантиндик зыяндуу организмдерди өз убагында аныктоого жана алардын жайылышына жол бербөөгө багытталган.
