"Кыргыз Агрохолдинг" Бишкекте 100гө чейин эт фудтрагын ачууну көздөөдө
"Кыргыз Агрохолдинг" ААК Бишкекте жана өлкөнүн аймактарында 100гө чейин эт сатуучу фудтракты этап-этабы менен ачууну пландоодо. Бул тууралуу Монополияга каршы жөнгө салуу кызматы менен компаниянын өкүлдөрүнүн жолугушуусунда айтылды.
Учурда Бишкекте компаниянын 10 соода түйүнү иштеп жатат. Анда эт продукциясынын түрлөрү сатылып, сөөктүү эттин бир килограммы 680 сомдон сунушталууда.
12-августта өткөн жолугушууда тараптар эт рыногундагы суроо-талап менен сунуштун абалын, продукциянын өздүк жана акыркы баасына таасир эткен факторлорду, ошондой эле эт өндүрүү жана сатуу көлөмдөрүн талкуулашты.
Компания жаңы соода түйүндөрүн ачуу аркылуу эттин калк үчүн жеткиликтүүлүгүн жогорулатууну жана ата мекендик өндүрүүчүлөрдүн продукциясын сатуу мүмкүнчүлүктөрүн кеңейтүүнү көздөөдө.
Жолугушуунун жыйынтыгында тараптар маалымат алмашууну күчөтүү жана эт рыногундагы кырдаалга туруктуу мониторинг жүргүзүү боюнча макулдашты.
Монополияга каршы жөнгө салуу кызматы Айыл чарба министрлиги менен биргеликте ички рынокту эт менен туруктуу камсыз кылуу жана бааларга мониторинг жүргүзүү иштерин улантат.
