"Кыргызфармацияга" дары-дармек жеткирүү үчүн 12 атайын унаа берилди
"Кыргызфармация" мамлекеттик ишканасына дары-дармектерди медициналык мекемелерге жеткирүү үчүн 12 атайын унаа тапшырылды. Анын алтоосу мамлекет башчысы тарабынан берилген. Бул тууралуу Өкмөттүн басма сөз кызматынан билдиришти.
Унаалар ишкананын логистикалык мүмкүнчүлүктөрүн кеңейтүүгө жана дары-дармектерди медициналык мекемелерге, анын ичинде алыскы аймактарга өз убагында жеткирүүгө багытталган.
Буга чейин "Кыргызфармациянын" өздүк автопаркы түзүлө элек болгондуктан, ташуулардын олуттуу бөлүгү жеке транспорттук уюмдардын жардамы менен жүргүзүлүп келген.
Унааларды тапшыруу аземине Министрлер Кабинетинин төрагасынын орун басары Улан Маматканов катышты. Ал ата мекендик фармацевтика тармагын өнүктүрүү, дары-дармектердин керектүү запасын түзүү жана аларды сатып алуу менен жеткирүү механизмдерин өркүндөтүү боюнча иштер жүрүп жатканын белгиледи.
Ошондой эле 2025-жылдын жыйынтыгы боюнча Кыргызстанда фармацевтикалык продукциянын өндүрүш көлөмү 1,7 эсеге өскөнү айтылды.
Маматканов ата мекендик фармацевтика өнөр жайын өнүктүрүү үчүн инвестицияларды жана заманбап технологияларды тартуу, өндүрүштү кеңейтүү жана импортко болгон көз карандылыкты этап-этабы менен азайтуу зарылдыгын белгиледи.
