Кыргызстан органикалык продукция үчүн лабораториялык базаны күчөтөт
Бүгүн Айыл чарба министрлигинде лабораторияларга комплекстүү баа берүү боюнча ведомстволор аралык жумушчу топтун экинчи жыйыны өттү.
Министрликтин маалыматына ылайык, жыйында өлкөдө иштеп жаткан лабораториялардын абалы, материалдык-техникалык жабдылышы, кадрдык потенциалы, техникалык мүмкүнчүлүктөрү жана жүргүзүлүп жаткан изилдөөлөрдүн түрлөрү боюнча талдоо сунушталды.
Өзгөчө айыл чарба продукцияларына анализ жүргүзүү, анын ичинде пестициддердин калдыктарын аныктоо, ошондой эле продукциянын сапатын жана коопсуздугун тастыктоочу башка көрсөткүчтөрдү текшерүү мүмкүнчүлүктөрүнө көңүл бурулду.
Министрдин орун басары Рысгүл Акимжанова органикалык өндүрүштү өнүктүрүү үчүн зарыл болгон лабораториялык базаны түзүүнүн маанилүүлүгүн белгиледи. Анын айтымында, органикалык продукцияга коюлган талаптарга ылайык лабораториялардын мүмкүнчүлүктөрүн жана жүргүзүлүүчү изилдөөлөрдүн түрлөрүн кеңейтүү зарыл.
Жыйынтыгында лабораторияларды баалоо жана органикалык өндүрүш үчүн зарыл болгон лабораториялык инфраструктураны өнүктүрүү боюнча сунуштарды даярдоо багыттары аныкталды.
Лабораториялык мүмкүнчүлүктөрдү кеңейтүү органикалык продукциянын сапатын жогорулатууга жана анын ички жана тышкы рынокторго чыгуу мүмкүнчүлүгүн арттырууга багытталат.
