Оштогу токсикологиялык лаборатория эл аралык аккредитациядан өттү
Суу ресурстары, айыл чарба жана кайра иштетүү өнөр жай министрлигине караштуу Өсүмдүктөрдү химиялаштыруу, коргоо жана карантин департаментинин Ош адистештирилген контролдук-токсикологиялык лабораториясы эл аралык ISO/IEC стандартынын талаптарына ылайыктыгын баалоодон ийгиликтүү өтүп, аккредитациялоо жөнүндө күбөлүк алды.
Суу ресурстары, айыл чарба жана кайра иштетүү өнөр жай министрлигинин маалыматына ылайык, аккредитация лаборатория жүргүзгөн сыноолордун сапатын, алынган натыйжалардын ишенимдүүлүгүн жана лабораториянын техникалык компетенттүүлүгүн тастыктайт.
Лабораторияда минералдык, органикалык жана органоминералдык жер семирткичтер, топурак, суу, ошондой эле өсүмдүк продукциясындагы пестициддердин жана агрохимикаттардын калдыктары изилденет.
Бул жетишкендик айыл чарба продукциясынын коопсуздугун камсыз кылууга жана республикадагы агрохимиялык лабораториялык кызмат көрсөтүүлөрдүн сапатын жогорулатууга өбөлгө түзөт.
Министрлик республикада азык-түлүк коопсуздугун камсыз кылуу боюнча жүргүзүлүп жаткан иштердин алкагында эл аралык стандарттардын талаптарына жооп берген лабораториялык ишмердүүлүктү колдоого жана өнүктүрүүгө өзгөчө көңүл бурат.
