Ысык-Көлдө "Ак-Булак" ишканасына 41 миң сом айып салынды
Жаратылыш ресурстары министрлигине караштуу Ысык-Көл облустук Экологиялык-техникалык көзөмөл кызматы Ак-Суу районунун Башарын участогунда жайгашкан "Ак-Булак" ишканасына пландан тышкаркы текшерүү жүргүздү.
Ведомствонун маалыматына ылайык, текшерүүнүн жыйынтыгында айлана-чөйрөгө агынды сууларды чыгаруу тартибин бузгандыгы үчүн ишканага 28 миң сом айып салынды.
Мындан тышкары, жерлерди пайдалануу эрежелерин бузгандыгы үчүн 13 миң сом айып пул салынды. Жалпы административдик айып пулдардын суммасы 41 миң сомду түздү.
Ошондой эле жер кыртышына келтирилген зыянды өндүрүү максатында 7,2 миң сом өлчөмүндө доо коюлду.
