Ала-Букадагы Чанач-Сай суу сактагычын кеңейтүү пландалууда
Президент Садыр Жапаровдун тапшырмасынын негизинде Кыргызстанда суу ресурстарын ырааттуу пайдалануу жана айыл чарбасын туруктуу суу менен камсыз кылуу боюнча масштабдуу иштер жүргүзүлүүдө. Бул тууралуу президенттин өзгөчө тапшырмалар боюнча атайын өкүлү Бакыт Төрөбаев билдирди.
Маалыматка ылайык, 106 жаңы суу сактагычтарды куруу долбоордун алкагында Ала-Бука районундагы Чанач-Сай суу сактагычын кеңейтүү каралган. Учурдагы 2 млн. куб метрлик сыйымдуулук жаңы долбоор ишке ашканда 8,14 млн. куб метрге жеткирилет. Натыйжада, учурда 3 миң гектарды камсыздап жаткан сугат аянты 5 миң гектардан ашат.
Бүгүнкү күндө өлкөдө 12 жаңы суу сактагычтын курулушу жүрүп, дагы 29 долбоор даярдалууда. Президент тарабынан 2030-жылга чейин 106 суу сактагычты куруу милдети коюлган. Негизги максат – суу ресурстарын натыйжалуу пайдалануу, сугат жерлерин кеңейтүү жана азык-түлүк коопсуздугун бекемдөө болуп саналат.
