Бишкекте Кыргызстан – Корея достук паркына 70 түп гибискус отургузулду
Кечээ Бишкек шаарындагы Кыргызстан менен Кореянын достук паркында экологиялык акция өтүп, 70 түп гибискус бадалы отургузулду. Бул тууралуу муниципалитеттен билдиришти.
Иш-чарага Бишкек шаарынын мэри Айбек Джунушалиев, Кыргызстандагы Кореянын Атайын жана Ыйгарым укуктуу элчиси Ким Кван Дже, Кореянын Кёнгидо провинциясынан келген жаш ыктыярчылар, "Кая КДЖИ" коомдук кайрымдуулук фондунун өкүлдөрү жана Бишкек шаарынын мэриясынын Дене тарбия жана спорт, туризм жана жаштар менен иштөө департаментинин алдындагы Жаштар иштери боюнча консультативдик кеңештин мүчөлөрү катышты.
Мэр Айбек Джунушалиев мындай демилгелер Кыргызстан менен Корея Республикасынын ортосундагы достукту жана кызматташтыкты бекемдөөгө өбөлгө түзөрүн белгиледи.
"Бүгүн биз жөн гана бадалдарды отургузбастан, элдерибиздин ортосундагы достуктун дагы бир символун жаратып жатабыз. Экология, климаттын өзгөрүшүнө каршы күрөшүү жана шаардык чөйрөнү жакшыртуу багыттарындагы кызматташтык биз үчүн өзгөчө мааниге ээ. Бул демилгеге катышып жаткан жаштарга ыраазычылык билдирем жана мындай жакшы саамалыктар мындан ары да улантыларына ишенем", — деди мэр.
Акция Кыргызстан менен Кореянын ортосундагы достук мамилелерди бекемдөөгө, ошондой эле Бишкек шаарын көрктөндүрүүгө жана жашылдандырууга багытталды.
