Бишкектеги теннис комплекси оңдоп-түзөөдөн өткөрүлөт
Бишкек шаарында “Жабык теннис комплексин оңдоо жана жеңил конструкцияларды куруу” долбоору боюнча мамлекеттик-жеке өнөктөштүк жөнүндө келишимге кол коюлду. Долбоор Бишкек шаарынын 4-кичи районунда ишке ашырылат. Иш-чарага Бишкек шаарынын мэринин биринчи орун басары Кубанычбек Иманалиев жана мэрдин орун басары Рахат Мусаева катышты. Бул тууралуу шаардык мэриядан билдиришти.
Маалыматка ылайык, келишимге Бишкек шаарынын мэриясынын Дене тарбия жана спорт, туризм жана жаштар менен иштөө департаменти менен “Прайм Корт” ЖЧКсы кол коюшту. Документ тиешелүү сынактын жыйынтыгы боюнча түзүлүп, анын жеңүүчүсү болуп “Прайм Корт” ЖЧКсы табылган.
Долбоорду ишке ашыруунун негизги максаты – чоң теннис менен машыгуу үчүн шарттарды жакшыртуу, массалык жана профессионалдык спортту өнүктүрүү, ошондой эле борбор калаанын спорттук инфраструктурасын жаңылоо. Бул өз кезегинде Бишкек шаарынын спорттук борбор катары имиджин жогорулатууга өбөлгө түзөт.
Мындан тышкары, шаар тургундарын спорттун түрлөрү менен машыгууга кеңири тартуу жана спортко жаңыдан кызыгып баштаган жаштарды колдоо максатында долбоордун алкагында падел-теннис үчүн атайын аянтча да курулат.
Келишимге кол коюлушу Бишкек шаарындагы спорттук инфраструктураны өнүктүрүүгө багытталган мамлекеттик-жеке өнөктөштүк долбоорлорун ишке ашыруунун кезектеги маанилүү этабы болуп саналат.
