Кыргызстанда 540 социалдык объекттин курулушу жүрүп жатат
Күн мурун курулуш, архитектура жана турак жай-коммуналдык чарба министри Нурдан Орунтаев Манас шаарына болгон иш сапарынын алкагында бир катар социалдык объектилердин курулушу менен таанышты.
Министрликтин маалыматына ылайык, иш сапарга Президенттин Жалал-Абад облусундагы ыйгарым укуктуу өкүлү Тилек Текебаев жана Манас шаарынын мэри Уларбек Исмаилов катышты.
Министр журналисттердин суроолоруна жооп берип жатып, учурда Курулуш министрлигинин көзөмөлүндө республика боюнча 540 социалдык объект курулуп жатканын билдирди. Алардын басымдуу бөлүгүн билим берүү тармагындагы объектилер түзөт.
"Мамлекет тарабынан курулуп жаткан бир да объектте курулуш иштери токтогон жок. Буга чейин башталган бардык объектилерде иштер белгиленген графикке ылайык улантылып жатат. Ар бир объекттин сапаты, курулуштун жүрүшү жана мөөнөтү министрликтин көзөмөлүндө", — деди Нурдан Орунтаев.
Иш сапардын жүрүшүндө Манас шаарындагы "Акылман" Президенттик лицейинин, жаңы мектептердин, Жалал-Абад облустук клиникалык ооруканасынын жаңы корпусунун жана 5200 орундуу спорт сарайынын курулушу каралды.
Тиешелүү жетекчилерге курулуш иштеринин сапатын көзөмөлдөө жана объектилерди белгиленген мөөнөттө пайдаланууга берүү тапшырылды.
