Кыргызстанда абанын булганышына жаңы ыкма менен мониторинг жүргүзүлөт
Кыргызстанда Борбордук Азияда биринчи жолу абанын булганышына таасир эткен температуралык инверсияларга мониторинг жүргүзүлө баштайт.
Жаратылыш ресурстары, экология жана техникалык көзөмөл министрлиги Дүйнөлүк банктын колдоосу менен ишке ашырылып жаткан "Кыргыз Республикасында абанын сапатын жакшыртуу" долбоорунун алкагында Кыргызгидрометке МТР-5 метеорологиялык жабдуусун өткөрүп берди.
Ведомствонун маалыматына ылайык, жабдык абанын температурасын жерден 1000 метрге чейинки бийиктикте өлчөп, температуралык инверсияны аныктоого мүмкүндүк берет.
Температуралык инверсия учурунда жерге жакын аба катмарынын кыймылы начарлап, түтүн, чаң жана башка зыяндуу заттар өйдө көтөрүлбөй, шаар үстүндө топтолуп калат. Натыйжада абанын булганышы күчөшү мүмкүн.
Жаңы жабдык аркылуу адистер мындай көрүнүштөргө үзгүлтүксүз мониторинг жүргүзүп, аба ырайынын абанын булганышына тийгизген таасирин аныктай алышат.
Мындай мониторинг системасы Кыргызстанда биринчи жолу колдонулууда.
