“Манас Деми” эл аралык марафонунун байге фонду 1 млн сомду түзөт
19-сентябрда Талас шаарында экинчи жолу Кыргызстандан жана башка өлкөлөрдөн келген жөө күлүктөр жарышат.
Прзедиенттин Талас облусундагы ыйгарым укуктуу өкүлчүлүгүнүн маалыматына ылайык, жарыш "Манас Ордо" улуттук тарыхый-маданий комплексинин аймагында өтөт. Быйыл уюштуруучулар 1,5 миңге жакын катышуучуну күтүп жатат.
Программада 21,1 км, 10 км жана 3 км аралыктагы жарыштар, ден соолугунун мүмкүнчүлүгү чектелген адамдар үчүн өзүнчө 1 км жарыш, ошондой эле балдар арасында өтүүчү “Манас Деми – Балакай” жарышы бар.
Байге фонду 1 млн сомду түзөт. Ар бир чоңдор арасындагы аралык боюнча эркектер жана аялдар категориясында жеңүүчүлөр аныкталат.
Спорттук программа менен катар “Манас Деми” аянтчасында кыргызстандык аткаруучулардын катышуусунда концерт өтөт.
Жарым марафондун алкагында чогулган бардык каражат Талас облусундагы балдар үйлөрүнө өткөрүлүп берилет.
“Манас Деми” жарышын президенттин Талас облусундагы ыйгарым укуктуу өкүлчүлүгү жана “Альянс Алтын” компаниясы уюштурууда.
