Н.Орунтаев: Быйыл 36 мектеп жаңы талаптарга ылайык курулууда
Курулуш, архитектура жана турак жай-коммуналдык чарба министри Нурдан Орунтаев Манас шаарында курулуп жаткан жаңы мектептердин курулушу менен таанышты. Бул тууралуу ведомстводон билдиришти.
Министрдин айтымында, жаңы мектептерди курууда сапатка, функционалдуулукка, коопсуздукка жана заманбап архитектуралык чечимдерге өзгөчө көңүл бурулууда.
"Биз мектептерди курууда эски ыкмалардан чыгып, ички шарттары менен гана чектелбей, алардын сырткы көрүнүшүнө да талапты күчөтүп жатабыз. Мурдагыдай ак штукатурка эмес, сапаттуу жана заманбап фасаддык материалдар колдонулууда. Мектептер көрктүү болуп, ошол эле учурда узак жылдар бою өзүнүн сапатын жана көрүнүшүн сакташы керек", – деди Нурдан Орунтаев.
Ошондой эле министр Президенттин тапшырмасы менен быйыл курулушу башталган 36 мектепте жаңы жана заманбап чечимдер колдонулуп жатканын белгиледи.
Атап айтканда, мектептердин фасаддары жаңы материалдар менен жасалгаланып, окуучулар үчүн лифттер орнотулуп, имараттар заманбап эмеректер менен камсыздалууда.
