Ошто "Эмаком" курган 12 кабаттуу үйгө шайкештик актысы берилди
Курулуш, архитектура жана турак жай-коммуналдык чарба министри Нурдан Орунтаев 18-августта Ош шаарындагы "Эмаком" компаниясы курган турак жай комплексинин жашоочулары менен жолугуп, алардын көйгөйлөрүн укту.
Ведомствонун маалыматына ылайык, 12 кабаттуу үйдүн курулушу аяктаганы менен объектти пайдаланууга берүү боюнча шайкештик актысы алынган эмес. Мындан улам жашоочулар коммуналдык кызматтар үчүн коммерциялык тариф менен төлөп, газ менен камсыздоодо да кыйынчылыктарга туш болушкан.
Министр тиешелүү башкармалыктарга маселени мыйзам чегинде чечүү боюнча тапшырма берди.
Натыйжада 19-августта Ош шаардык мамлекеттик архитектура-курулуш контролдоо департаменти тарабынан объектти пайдаланууга берүү боюнча шайкештик актысы берилди.
Нурдан Орунтаев ошондой эле министрликти жетектеп келген учурда мыйзамсыз курулган көп кабаттуу объектилердин саны 200гө жакын болсо, учурда алардын саны 10го жакын калганын билдирди.
