Чүй дарыясынын жээктерин бекемдөө иштери күчөтүлдү
Курулуш министрлигине караштуу Мамлекеттик архитектура-курулуш контролдоо департаментинин Чүй региондук башкармалыгы Өзгөчө кырдаалдар министрлигинин өкүлдөрү менен биргеликте Чүй дарыясындагы жээктерди бекемдөө иштерине көзөмөл жүргүзүүдө.
Ведомствонун маалыматына ылайык, көзөмөлдүн негизги максаты — сел жана суу ташкындарынын алдын алуу, дарыя жээктеринин жуулуп кетишине жана жер көчкү коркунучуна жол бербөө. Ошондой эле дарыянын нугунун өзгөрүшүнө бөгөт коюп, аткарылып жаткан иштердин сапатын камсыз кылууга өзгөчө көңүл бурулууда.
Аталган объект Чүй региондук башкармалыгынын курулуп жаткан объектилеринин реестрине киргизилген. Учурда объектте шаар куруу жана архитектура жаатындагы талаптардын сакталышы, ошондой эле курулуш иштеринин сапаты туруктуу көзөмөлдөнүүдө.
Маалыматка ылайык, Ысык-Ата жана Аламүдүн райондорундагы тиешелүү тилкелерде жээктерди бекемдөө иштери аяктоо алдында турат.
Ал эми Сокулук районунда Чүй дарыясынын жээктерин бекемдөө иштери күчөтүлгөн тартипте улантылууда.
